早兩天與家母提起連續三日都要赴宴,
母親忽然拋下一句︰
「都好既, 等你見下呢D場面...」
當時心諗,
大大話話都「飲」左20年,
仲有咩要見識呢﹖
結果今日才不過係第一晚,
就已經薄有驚喜。
今晚身份為新郎同事,
同桌亦有另外四位相識的同事,
其餘聽講就為新郎的大學同學。
四男兩女, 其中二人是情侶闗係,
另再有一位「阿傑」遲到,
故我旁邊的位置一直懸空。
尚未開席,
已經聽到一些儲如︰
「結婚之後要個女仔出黎做野會好冇面」既膠論,
當時已經好肯定今晚返黎會寫blog,
所以特別留心這群人的談話內容。
(咩喎, 我唔8你今晚都冇得睇呢篇Blog喇係咪?)
席間,情侶中既「女朋友」可謂直情流露,
全程雙手冇遞出過酒杯範圍,
但係就不停以Command形式指示男友夾餸,
最經典莫過於叫男友「夾一粒草菇」俾佢。
即係點?即係你一定要俾草菇佢, 仲一定要一粒,
如果唔係草菇或者多過一粒草菇,
佢可以發你爛渣咁解。
發展到呢一刻,
我都以為今晚篇blog會以女朋友為主,
但原來主角往往真係最後先出場......
稱為「阿傑」既男子終於出現,
坐底冇幾耐佢就開始同各位大學同學高談闊論。
雖然我都認為一個人講野有適量body movement絕對是好事,
但「阿傑」似乎忘記左佢右手邊呢位朋友, 即係我,
係一位素未謀面既人,
又或者佢誤以為佢既活動範圍有一百呎,
足夠俾佢跳返part舞。
但事實上唔係囉!!!!
今晚既位真係唔係太寬落,
令到我成晚唯有不停靠向田小姐避開佢隻掌...
忽然間, 女朋友(都幾大聲)問一句︰
「你估呢...」
然後靠向「阿傑」耳邊耳語...
跟手呢位阿傑就大大聲咁話︰
「梗係唔駛喇!!!!
呢D都有得賺喇, 個時我7千都有得賺呀!」
我想問呢兩個人咩事????
食左都冇三個餸, 仲要有半圍係唔識既,
駛唔駛咁快討論呢D野呀?
我一直以為一路食一路話人地D野唔好食既人已經好cheap,
估唔到原來低處真係未算低。
然後, 好明顯「女朋友」係俾緊壓力佢男朋友,
不停問「阿傑」關於結婚擺酒既(錢銀)問題;
而呢位「阿傑」亦(好似)好Expert地發表,
例如佢指摘擺酒個時拍video的cam man好唔專業,
根本係呃人錢...
(但其後佢又發表佢只係識用DC既膠論)
((而當中最好笑既係講左咁耐,
「阿傑」最後終於講出原來佢當年結緍係買律師樓Package一條龍咩都包個D。
ok, 明左, 唔該哂你喎Mr. Expert...))
終於終於,
終於到了炒飯+伊麵上枱時間,
接近尾聲, 我以為可以食一啖安樂茶飯。
就係呢個時候,
「阿傑」突然好大力咁丟低左個碗,
(真係擲地有聲個種, 個下聲直頭係鏗鏘)
跟住又用佢好似好Expert既語氣話︰
「早兩日我係屋企炒個飯,
同呢個差唔多囉...」
然後誓死唔肯再食一粒落口。
平心而論,
我覺得今晚既飯菜的確係強差人意,
但係實在唔需要咁做下嘛﹖
成件事除左話到俾我知你唔識炒飯之外,
真係一D意義都冇。
代表你好識食咩?好有型咩?
唔該, 各位會去/要去/去左飲宴既人士,
我希望你有機會睇到呢篇blog個時都諗一諗︰
你去飲個時,
唔好諗住D人唔識就講咩都得,
而家資訊好發達, 可能你求求其其做D野,
但同枱既人返到去可能寫出blog或者fb,
最重要既係,
你自己衰唔緊要,
但你可能係代表左男家/女家/某一個party既人,
係會影響左別人對佢地觀感。
例如今晚, 我就覺得Uxx某個系既人好差囉。
* * * * * * * * * *
有個小插曲,
好想講埋佢。
話說係美點雙輝時段,
女朋友既纖纖玉手依然冇伸出多過10cm,
男朋友亦好識做地自動波幫女朋友拎左一件點心,
放係佢隻碟度, (爭在未放埋落佢個口度)
然後就好深情咁望住個女朋友唔郁。
女朋友開口︰
「你唔食咩?」
男友即刻9秒9企係身,
再拎一件同款既點心放係自己隻碟度。
好慘囉呢個男仔...
* * * * * * * * * *
最後,
再次恭喜C同事同老婆新婚愉快,
祝你地百年好合!
(同埋我想讚C同事你真係出於污泥而不染呀!)